Канон святителю николаю. Полный сборник канонов и молитв святителю николаю, архиепископу мирликийскому Канон святому николаю чудотворцу

Канон святителю Николаю, глас 2-й.
Песнь 1
Ирмос: Во глубине постла иногда фараонистское всевоинство преоруженная сила, воплощшееся же Слово всезлобный грех потребило есть: Препрославленный Господь, славно бо прославися.

Припев:Святителю отче Николае, моли Бога о нас.

Венценосец престолу Христову, премудре Николае, предстоя со Ангельскими воинствы, просвещение ми даруй, озаряющее души моея омрачение, яко да восхвалю радуяся твою всеблаженне память.

Слава, И ныне: Сравнитися желание ми вложив змий вселукавый, Содетелю, яко пленника восхити, Тобою же Всечистая, воззван бых, обожився истиннейше: Ты бо, о Богомати, мене Обожившаго родила еси.

Песнь 3
Ирмос: Процвела есть пустыня яко крин, Господи, языческая неплодящая церковь, пришествием Твоим, в нейже утвердися мое сердце.

Николае блаженне, Владыки искренний ученик ты быв, спасаеши к тебе притекающия от лютых бед и смерти горькия.

Слава: Очисти рабы Твоя, грехов оставление яко Благ даруя, Николаа Твоего угодника, яже к Тебе ходатайствы, Многомилостиве.

И ныне: Утоли смущение души моея, Пречистая, и жизнь окорми, Всесвятая, Бога Рождшая, в Немже утвердися сердце мое.

И катавасия: Моли Бога о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.

(Или, ина катавасия: Избави от бед рабы своя, святителю Христов Николае, яко вси по Бозе к тебе прибегаем, к скорому помощнику и теплому заступнику, и молебнику ко Спасу о душах наших.)

Посем Господи, помилуй,трижды.

Седален, глас 4:
Возшед на высоту добродетелей, Божественными оттуду отче озарився сиянии чюдес, пресветел воистину явился еси мирови пастырь, нам в напастех сый престатель непобедимь: темже преславно врага победив, лжу отгнал еси и человеки спасл еси от смерти, Николае. Моли Христа Бога, грехов оставление даровати, чтущим любовию святую память твою.

Слава, и ныне.
Яко Деву и Едину в женах Тя без семене рождшую Бога плотию, вси ублажаем роди человечестии: огнь бо вселися в Тя Божества, и яко младенца доиши Зиждителя и Господа. Тем ангельский и человеческий род достойно славим Пресвятое Рожество Твое, и согласно вопием Ти: моли Христа Бога грехов оставление даровати, покланяющымся верою Пресвятому Рождеству Твоему.

Песнь 4
Ирмос: Пришел еси от Девы, не ходатай, ни ангел, но Сам, Господи, воплощься, и спасл еси всего мя человека, тем зову Ти: слава силе Твоей, Господи.

Приближився чисте зарям духовным, светоносец был еси, мира просвещая концы, всем предстательствуя, и вся спасая верою к тебе притекающия.

Избавляя от смерти, яко явился еси первее Николае, юноши преподобне: тако и ныне мя спаси от всякаго обстояния, и напастей и бед, всеблаженне.

Слава: Облистал еси добродетелей сияньми всеблаженне, подражатель всеизряднейший твоего Владыки быв, спасаеши же призываемь, благоговением и любовию тя славящия.

И ныне: Найде на Тя Владыка твари Воплощаемь, и спасая яко Благоутробен всего мя человека: темже вернии Богородицу Тя славим.

Песнь 5
Ирмос: Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим: иного бо разве Тебе Бога не знаю.

Боголепным житием, треблаженне, просвещаемь, осужденныя неправедным изречением умрети, представ, избавил еси, Владыце Христу зовущия: иного бо разве Тебе Бога не знаем.

Слава: На Небесех присносущную славу ныне зря, и неизглаголанныя и Божественныя зари светлейшими наслаждаяся сиянии, покрый мя предстательством твоим, преподобне, угодниче Христов всечестне.

И ныне: Да Твой взыщеши образ, погребенный страстьми, Спасе, небесных утаився сил, воплощься из Девы, явился еси Тебе зовущим: иного разве Тебе Бога не знаем.

Песнь 6
Ирмос: В бездне греховней валяяся, неизследную милосердия Твоего призываю бездну, от тли, Боже, мя возведи.

Иже победы Николае, венец на твоем версе достойно положися: яко победитель убо изряднейший, тя призывающия спаси.

Слава: Умерщвленна мя, блаженне, прегрешеньми, и страстей треволненьми погружаема, явився спаси ко пристанищу Божественыя воли.

И ныне: На Тя надежды возложих Мати Приснодево, спасения моего, и Тя Предстательницу полагаю жизни, тверду же и непоколебиму.

Катавасия: Моли Бога о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.

(Или, ина: Избави от бед рабы своя, святителю Христов Николае, яко вси по Бозе к тебе прибегаем, к скорому помощнику и теплому заступнику, и молебнику ко Спасу о душах наших.)

И поем Господи, помилуй, якоже и по 3-ей песни.

Слава, и ныне:

Кондак, глас 3.
В Мирех святе священнодействователь показался еси, Христово бо преподобне Евангелие исполнив, положил еси душу твою о людех твоих, и спасл еси неповинныя от смерти. Сего ради освятился еси, яко великий таинник Божия благодати. Воспоим ныне святителя песньми, Мирским людем пастыря и учителя, да молитвами его просветимся: се бо явися чист весь, нетленен духом, Христу принося жертву непорочну, чисту, Богу благоприятну: яко святитель очищен и душею и телом, темже сый истинно Церкве предстатель и поборник Сея, яко великий таинник Божия благодати.

Песнь 7
Ирмос: Образу златому на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.

Острому искушению впадох, и люте пострекаемь, и ко вратом ада приближихся, скорбьми поражаемь, спаси мя молитвами твоими, блаженне, и возстави поюща: благословен еси Боже отец наших.

Слава: Незаходимаго света Невещественными лучами облистаемь, сущия во тьме скорбей озлобленныя исхити, и к просвещению веселия настави поющия: благословен еси Боже отец наших.

И ныне: Моли Христа, Сына Твоего и Бога, Дево Богородительнице, проданныя лютыми прегрешеньми и лестьми змииными, Кровию Его честною избавитися поющим: благословен еси Боже отец наших.

Песнь 8
Ирмос: В пещь огненну ко отроком еврейским снизшедшаго, и пламень в росу преложшаго Бога, пойте, дела, яко Господа, и превозносите во вся веки.

Яко благ и сострадателен, во глубине напастей люте содержимыя свободи, блаженне Николае, от содержащих лютых разрешение подая молитвами твоими, яже ко Спасу Христу, священнотаинниче.

Слава: Тайновождь сущих паче ума, святых служитель и Небесных сый богомудре, архиерей же верен, прегрешений оставление проси от Спаса нашего, священноявленне.

И ныне: Изнемогает мой ныне ум, во глубину впад безчестия, яко отвсюду различными объят есмь злыми: но Ты, Дево, исцели, безстрастия светом одевающи.

Песнь 9
Ирмос: Безначальна Родителя Сын, Бог и Господь, воплощься от Девы нам явися, помраченныя просветити, собрати расточенныя, Тем Всепетую Богородицу величаем.

Свещами благодати Богомудре просвещаемь, и светильник благочестия яве был еси, сущия в напастех спасаеши, и сущия во глубине морстей избавляеши, и питаеши алчущия преславно, всеблаженне.

Слава: Иже в раи сладости ныне водворяяся, и неизреченную славу ясно зря, от Небесных круг певцы твоя назираеши, от страстей избавляя, богоносе всеблаженне.

И ныне: Премудрость, и Силу, и Слово Ипостасное Отчее, Богомати Чистая родила еси, от Твоих Пречистых кровей Свой Храм Приимшую, и сему по соединению соединившуюся нераздельно.

Тропари святителю Николаю, Архиепископу Мир Ликийскому

Тропарь, глас 4

Правило веры и образ кротости, воздержания учителя яви тя стаду твоему яже вещей истина: сего ради стяжал еси смирением высокая, нищетою богатая. Отче священноначальниче Николае, моли Христа Бога спастися душам нашым.

Кондак, глас 3

В Мирех, святе, священнодействитель показался еси: Христово бо, преподобне, Евангелие исполнив, положил еси душу твою о людех твоих, и спасл еси неповинныя от смерти; сего ради освятился еси, яко великий таинник Божия благодати.

Тропарь на рождество святителя Николая Чудотворца

Тропарь, глас 4

Чудное и славное рождество твое, святителю Николае, Церковь днесь православных светло празднует, ибо стоянием ногу твоею яви тя Господь и провозвести быти светильника и учителя миряном, весь мир обогащающа и просвещающа чудесы. Тем вопием ти: моли Христа Бога спастися душам нашим.

Тропарь на перенесение мощей святителя и чудотворца Николая, архиепископа Мир Ликийских

Тропарь, глас 4

Приспе день светлаго торжества, град Барский радуется, и с ним вселенная вся ликовствует песньми и пеньми духовными: днесь бо священное торжество, в пренесение честных и многоцелебных мощей Святителя и Чудотворца Николая, якоже солнце незаходимое возсия светозарными лучами, разгоняя тьму искушений же и бед от вопиющих верно: спасай нас яко предстатель наш, великий Николае.

Кондак, глас 3

Взыдоша, яко звезда, от востока до запада твоя мощи, святителю Николае, море же освятися шествием твоим, и град Барский приемлет тобою благодать: нас бо деля явился еси, чудотворец изящный, предивный и милостивый.

Тропарь на перенесение Великорецкой иконы святителя Николая Чудотворца из Вятки в Москву

Тропарь, глас 3

Яко драгоценное богатство, прииде к нам от Великия реки Вятки в царствующий сей град наш Москву честная икона образа твоего, святителю Николае, и многая убо чудеса в пришествии своем сотвори, болящия исцели и вся человеки удиви. Сего ради повелением самодержца царя списася с нея сия честная икона твоя на просвещение и моление всем людем царска града, юже днесь зрим и покланяемся ей, моляще тя, таинника Христова: моли, святе, о всех нас, даровати нам мир и велию милость.

Тропарь святителю Николаю Чудотворцу перед его иконой, именуемой “Зарайская”

Тропарь, глас 4

Пресветлый храме Святаго Духа, Богомудре отче Николае, благодатию небес освяти души наша, заступи и покрый всечестным твоим омофором, его же приял еси от рук Пречистыя Девы, и просвети нас светом заповедей Христа, от Него бо приял еси глаголы жизни. Моли благость Отца Небеснаго, во еже спастися православно чтущим тя, даруя нам велию милость.

Величание

Величаем тя, святителю отче Николае, и чтем святую память твою: ты бо молиши за нас Христа Бога нашего.

Канон святителю и чудотворцу Николаю, архиепископу Мир Ликийских

Канон первый из службы на перенесение мощей святителя Николая из Мир Ликийских в Бари, 9/22 мая

Глас 8-й:

Песнь 1

Ирмос : Песнь возслем, людие, чудному Богу нашему, свободившему Израиля от работы, песнь победную поюще и вопиюще: поим Тебе, единому Владыце.

Припев:

Песнь устен моих приими, благодетелю Христе, и уясни ми язык, не поминая многих моих грехов, да воспою честное житие Твоего святителя в память перенесения мощей его.

Чудотворный дар прием и терпения венцы, святительством украшаяся, Богу помолися, отче, прегрешений прощение даровати нам, славящим твое пренесение.

Слава: Пастырь Христова стада, отче, иным овцам посылаешися, к латинскому языку, да вся удивиши чудесы твоими и ко Христу приведеши, блаженне, Емуже и о нас молися непрестанно.

И ныне, Богородичен : Далече бывше иногда, язычестии народи рождеством Твоим, Богородице, к Богу приближихомся: Ты бо мене обожившаго породила еси и древния клятвы свободшаго Своею кровию.

Катавасия

* или иная положенная в читаемое время катавасия

Песнь 3

Ирмос: Небеснаго круга верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Припев: Святителю отче Николае, моли Бога о нас

Незлобивый нравом и кроткий образом, житие имея ангельское, Богоблаженне Николае, не престай о нас моляся единому Человеколюбцу.

Кий град, блаженне, не имеет тебе помощника? Кая ли душа не призывает твоего имене? Или коего места не присещаеши духом, твоими чудесы удивляя вся, Николае?

Слава: Барский убо град прият тело твое, но дух твой в Вышнем Иерусалиме, идеже ликуеши со пророки, и апостолы, и святители купно, моляся о нас единому Человеколюбцу.

И ныне, Богородичен: Просвещение ми испроси, пречистая Владычице, омраченному грехи многими, порождшая Свет всему миру, и страстную мглу далече отжени, едина Богоблаженная.

Катавасия : Моли Бога о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.

Господи, помилуй. (трижды)

Седален, глас 1

Освящ себе житием совершенным, явился еси святитель Бога Вышняго, от Негоже укрепляемь, еретичествующих уста заградил еси. Тем твое пренесение светло празднуем, Христа Бога величающе.

Слава, и ныне, Богородичен

Безневестная чистая Богородице Дево, едина верных предстательство и покрове, бед, и скорбей, и лютых обстояний всех избави, на Тя упование, Отроковице, имущих, и души наша спаси Божественными мольбами Твоими.

Песнь 4

Ирмос: Всел еси на кони, апостолы Твоя, Господи, и приял еси рукама Твоима узды их, и спасение бысть еждение Твое верно поющим: слава силе Твоей, Господи.

Припев: Святителю отче Николае, моли Бога о нас

Светом Вышняго озаряемь, святителю, мое сердце просвети и тьму греховную отжени, да радуяся, пою твое святое пренесение.

Возступль на лествицу добродетелей, блаженне, чудотворец явился еси по всей земли, Николае, и сего ради от Мир барстии людие приемлют святыя мощи твоя.

Слава: Иереи вернии о тебе хвалятся, и людие христолюбивии призывают тя, во бранех помощника, и мы, недостойнии, подвизаем тя к Богу за ны молитися, Николае.

И ныне, Богородичен: Чины ангельския удивляет, Богородице, тайны Твоея глубина, бесы же смущает Твоя икона. Ейже мы кланяемся, чтуще Тя, Божию Матерь.

Песнь 5

Ирмос: Мрак души моея разжени, Светодавче Христе Боже, началородную тьму изгнав бездны, и даруй ми свет повелений Твоих, Слове, да, утренюя, славлю Тя.

Припев: Святителю отче Николае, моли Бога о нас

В Мирех престол имел еси, в Бар тело преселил еси, и духом на небеси пребываеши, святителю Николае, со апостолы, яко преемник, с нимиже о нас моли, поющих твое пренесение.

Всех христиан надеждо, и обидимых велий заступниче, и болящих целителю, печальных утешителю и к Богу от человек ходатаю, отечеству нашему мир испроси и спасай нас от поганых нахождения.

Слава: Погруженную душу мою многими страстьми, Николае, умерщвленную грехопадением, оживи твоими молитвами и направи на покаяние, да с верными всеми твое славлю пренесение.

И ныне, Богородичен: Егоже тьмы ангельския и серафимская множества ужасаются и разумная тварь трепещет, Того яко Младенца, Дево, питаеши, Егоже образно на руку Твоею видяще, всегда покланяемся.

Песнь 6

Ирмос: Якоже пророка избавил еси из глубины преисподния, Христе Боже, и мене от грехов моих избави, яко Человеколюбец, и управи живот мой, молюся.

Припев: Святителю отче Николае, моли Бога о нас

Яко от окрина от Божественныя Твоея церкве нескудно приемлем здравие телесем и душам очищение, святителю Николае, чудеса бо точиши благодатию несомненною верою уповающим на тя.

От напастей различных, и от бед лютых, и скорбей, одержащих ны, и от различных злых, отче, яко Христов угодник преславный, избави рабы твоя, достодолжно чтущия твое святое пренесение.

Слава: Греховным мразом истерп и житейским ветром пореваемь, яко другое солнце, отче, подобие твоего образа видев, твоими молитвами да согреюся, служителю Христов Николае.

И ныне, Богородичен: Земных ум небесныя тайны не увесть, ни тварь Творца разума домыслится: преходит бо ум человеч от Девы рождество Господне. Ейже молящеся верою, грехов прощение приимем.

Господи, помилуй. (Трижды.) Слава, и ныне.

Кондак, глас 3

Взыде, яко звезда, от востока до запада твоя мощи, святителю Николае, море же освятися шествием твоим, и град Барский приемлет тобою благодать: нас бо деля явился еси чудотворец изящный, предивный и милостивый.

Икос

Воспоим ныне святителя песньми, мирским людем пастыря и учителя, да молитвами его просветимся: сей бо явися чист весь, нетленен духом, Христу принося жертву непорочну, чисту, Богу благоприятну, яко святитель, очищен душею и телом. Темже сый истинно Церкви предстатель и поборник сея и чудотворец изящен, предивен и милостив.

Песнь 7

Ирмос: На поле Деире иногда мучитель пещь постави на мучение Богоносных, в нейже три отроки песнословяху единаго Бога, троично воспеваху, глаголюще: отцев Боже, благословен еси.

Припев: Святителю отче Николае, моли Бога о нас

Днесь радуются Ангели Божии, рыдает же демонское множество: спасл бо еси люди от напасти и отгнал еси духи темныя. Тем достойно одолевый нарицаешися. Сего ради вопием Господеви: отец наших Боже, благословен еси.

Одержимии печалию немощи, различными недуги утруждени, с верою к раце твоей влекутся и, получивше твою милость, быстрообразно отходят, радостно Господеви поюще: отец наших Боже, благословен еси.

Слава: Предстоят ти, блаженне, собори правоверных людей, и хвалятся о тебе церковнии учители, прославляют же тя цари, яко заступника. Мы же ти молимся, спаси ны, Николае, поющия Господеви: отец наших Боже, благословен еси.

И ныне, Богородичен: О, како Спаса моего воспою, Егоже трепетно хвалят Ангели? Но Ты, Мати, настави мя и милосердие Сыновнее благоутробием Твоим понуди помиловати ны, на Тя уповающия, яко Ты, за ны молящи Его, от муки избавиши.

Песнь 8

Ирмос: Ангели и небеса, на престоле славы седящаго и яко Бога непрестанно славимаго благословите, пойте и превозносите Его во веки.

Припев: Святителю отче Николае, моли Бога о нас

Ангели небес яко служителя тя восприемлют, пророцы и апостоли яко клеврета сретают, Сам Господь тебе восприемлет, мы же, грешнии, милости просим.

Велика власть от Бога вдана ти есть, Николае: море повинуется, воздух слушает, и языцы покаряются, видяще преславная твоя чудеса.

Слава: Новому Израилю, христианскому народу, Спасе, славнейши Моисея показал еси Твоего святителя Николая, от всех зол нас избавляюща.

И ныне, Богородичен: Очищение грехов яко Мати Божия испроси и руку ми простри, Госпоже, погруженному во глубине нечаяния, да, надеждею востав, превозношаю Тя во веки вся.

Песнь 9

Ирмос: Благословен Господь Бог Израилев, воздвигнувый рог спасения нам в дому Давидове, отрока Своего, в нихже посети нас Восток с высоты и направил ны есть на путь мира.

Припев: Святителю отче Николае, моли Бога о нас

Благословен Господь Бог наш, яко прослави святителя в странах, чудес струи испущающа, в Мирех и в латинех вся исцеляюща и в России милостивно посещающа.

Честным сном уснул еси и тело в Бар пользы ради пустил еси, неусыпный быв заступник всем, верою призывающим тя, молитвами твоими, Николае.

Слава: Благословен небесе и земли Творец, Бог Вседержитель, Отец безначальный и всесильный, и Сын прежде век, от недр отрыгновенное Слово, Имже вся быша, яже о нас, и Дух исходяй Святый, Троице Святая, слава Тебе.

И ныне, Богородичен: Извитием словес по достоянию Тя похвалити не достизаю, небесных сил пребольшу и твари всея честнейшу, Бога и Творца порождшую плотию. Егоже моли, Богородице, да помилует ны в день судный.

О всехвальный и всеми чтимый архиерей, великий чудотворец, святитель Христов, отче Николай, человек Божий и верный раб, муж желаний, сосуд избранный, крепкий столп Церкви, светильник пресветлый, звезда озаряющая и освещающая всю вселенную! Ты – праведник, как пальма расцветший, насажденный во дворах Господа своего; живший в Мvрах, ты благоуханием мvра мiр исполнил и мvро неиссякающее благодати Божией источаешь. Твоим шествием, пресвятой отче, море освятилось, когда многочудесные твои мощи шествовали во град Барийский, чтобы от востока до запада восхвалялось имя Господне. О преискусный и предивный чудотворец, скорый помощник, горячий заступник, пастырь предобрый, спасающий словесное стадо от всяких бед! Тебя прославляем и тебя величаем, как надежду всех христиан, источник чудес, защитника верных, премудрого учителя, алчущих питателя, плачущих веселие, нагих одеяние, болящих врача, по морю плавающих кормчего, пленников освободителя, вдов и сирот питателя и заступника, целомудрия хранителя, младенцев кроткого воспитателя, старых укрепление, постников наставника, трудящихся упокоение, нищих и убогих изобильное богатство. Услышь нас, молящихся тебе и прибегающих под кров твой, яви предстательство твое о нас ко Всевышнему и исходатайствуй твоими богоугодными молитвами всё, полезное ко спасению душ и тел наших; сохрани святую обитель сию [или храм сей], всякий город и селение, и всякую страну христианскую и людей, в ней живущих от всякого бедствия помощью твоею; ибо знаем мы, знаем, как много может молитва праведного, содействующая ко благу; тебя же, праведного, после Преблагословенной Девы Марии, имеем мы предстателем ко Всемилостивому Богу, и к твоему, преблагой отче, горячему ходатайству и заступничеству смиренно прибегаем; ты нас сохрани, как бодрый и добрый пастырь, от всяких врагов, мора, землетрясения, града, голода, наводнения, огня, меча, нашествия иноплеменников, и во всяких бедах и скорбях наших подавай нам руку помощи, и отвори нам двери милосердия Божия; потому что мы недостойны взирать на высоту небес от множества неправд наших, связаны узами грехов, и никогда воли Создателя нашего не сотворили и не соблюли повелений Его. Потому приклоняем колена сокрушенного и смиренного сердца нашего пред Творцом своим, и твоего отеческого заступничества пред Ним просим: помоги нам, служитель Божий, да не погибнем со беззакониями нашими, избавь нас от всякого зла и от всякого дела враждебного, направь ум наш и укрепи сердце наше в правой вере, в которой по твоему предстательству и ходатайству, ни ранами, ни угрозами, ни мором, ни каким гневом Создателя своего поколеблены да не будем, но здесь мирно жизнь проживем и сподобимся видеть блага на земле живых, славя Отца, и Сына, и Святого Духа, Единого в Троице славимого и поклоняемого Бога, ныне и всегда, и во веки веков, аминь.

Канон святителю и чудотворцу Николаю, Архиепископу Мир Ликийских (на славянском языке*)

Молитвами святых отец наших, Господи Иисусе Христе Боже наш, помилуй нас. Аминь.
Царю Небесный: Трисвятое. Пресвятая Троице: Слава, и ныне: Отче наш: Господи, помилуй (12). Слава, и ныне: Приидите, поклонимся: (3) Псалом 50.

Тропарь, глас 4

Правило веры и образ кротости, / воздержания учителя / яви тя стаду твоему / Яже вещей Истина. / Сего ради стяжал еси смирением высокая, / нищетою богатая, / отче священноначальниче Николае, / моли Христа Бога, / спастися душам нашим.

Слава, и ныне, Богородичен

Еже от века утаеное / и Ангелом несведомое таинство, / Тобою, Богородице, сущим на земли явися Бог, / в неслитном соединении воплощаем / и, Крест волею нас ради восприим, / имже воскресив первозданнаго, / спасе от смерти души наша.

Песнь 1

Ирмос: Отверзу уста моя, / и наполнятся Духа, / и слово отрыгну Царице Матери, / и явлюся, светло торжествуя, / и воспою, радуяся, Тоя чудеса.

Пастырю добрый Христова стада, радуйся, Николае, / яко миряном отец честен и учитель был еси, / и мне подаждь, радуйся тебе приносити.
Святителю отче Николае, моли Бога о нас.
Роди земнии стецемся, / радуйся приносити святителю, / радость бо приносит вселенней неоскудно.
Слава: Избавльшему три воеводы от убиения неправеднаго вопием ти: / радуйся, Николае, заступниче прибегающим под кров твой.
И ныне: Богородице Дево, радуйся, / радость от Ангела приемшая, / и спаси Тебе величающих.

Песнь 3

Ирмос: Твоя песнословцы, Богородице, / живый и независтный источниче, / лик Себе совокупльшия духовно, утверди, / в Божественней Твоей славе / венцев славы сподоби.
Святителю отче Николае, моли Бога о нас.
Никтоже прибегаяй под кров надежды твоея, отче, тощь от тебе исходит, / но радуйся принося ти, помощь приемлет, Николае, / юже и мне подаждь, всеблаженне.
Святителю отче Николае, моли Бога о нас.
Ангели дивятся твоему, преподобне, теплому заступлению, / человецы же радуются, приемлюще молитвами твоими избавление от напастей бесовских, / темже радуйся, приносим ти, Николае прехвальне.
Слава: Шлем, и оружие непобедимое на диавола ты еси, / христианом же утверждение, и иерархом удобрение, Николае чудне; / радуйся, чудотворче великий, обуреваемым тихое пристанище.
И ныне: Заченши Зиждителя Своего, Богородице, / родила еси Творца всех и Господа, / Того моли избавити нас от напастей; / елика бо хощеши, вся можеши, / яко благая Благаго же Родительница.

Песнь 4

Ирмос: Седяй в славе на Престоле Божества, / во облаце легце, / прииде Иисус Пребожественный, / нетленною дланию, и спасе зовущия: / слава, Христе, силе Твоей.
Святителю отче Николае, моли Бога о нас.
Апостолом равнопрестольне, радуйся, Николае, / яко Ариеву ересь посрамил еси, / и велиарова шатания низложил еси, твоими молитвами; / не престай моля о рабех твоих.
Святителю отче Николае, моли Бога о нас.
Юношу онаго от руки Амиры срацынскаго избавил еси, / родителем же его радость даровал еси, / тем ти с ними и мы радуйся приносим, Николае преподобне.
Слава: Три воеводы от убиения неправеднаго, чудотворче, спасл еси, / явлься во сне царю благочестивому, и запретив ему, / и от них радуйся, приял еси, Николае, / и мене укрепи твоими молитвами.
И ныне: Преблагословенная Богородице, радуйся, / яко еси Царя всех престол, херувимов вышший, / не закосни, моля Своего Сына и Бога нашего, / о чтущих Тя присно, с Николаем блаженным.

Песнь 5

Ирмос: Ужасошася всяческая / о Божественней славе Твоей: / Ты бо, Неискусобрачная Дево, / имела еси во утробе над всеми Бога / и родила еси Безлетнаго Сына, / всем воспевающим Тя / мир подавающая.
Святителю отче Николае, моли Бога о нас.
Апостолов тезоименне, / со Ангелы равностоятелю Престола Владычня неотступне, / Ария безумновавшаго посрамил еси; / сего ради вопием ти, Николае, радуйся, / святителем удобрение и столпе церковный.
Святителю отче Николае, моли Бога о нас.
Руку ми даждь, Николае, помощи, моляся ко Господу, / занеже буря потопляет мя греховная, / и приведи к тихому пристанищу покаяния, отче, твоими молитвами.
Слава: Аще и много беззаконновах, Николае, / но не отступаю надежды покрова твоего, / всегда радуйся, принося ти; / ты мя избави от всякия скорби и беды, / елика бо хощеши, вся можеши.
И ныне: Облаче превышший небес, радуйся, / искапающий нам каплю, Богородице всеблагая, / подаждь от Бога людем нашим победу на варвары, / со иерархом Николаем Того моля.

Песнь 6

Ирмос: Божественное сие и всечестное / совершающе празднество, / Богомудрии, Богоматере, / приидите, руками восплещим, / от Нея рождшагося Бога славим.
Святителю отче Николае, моли Бога о нас.
Друг Христов и вторый Петр, явился еси, отче, радуйся, / яко еси столп церковный и чудесный орган, / Духом Святым чудодействуяй и бряцаяй: / темже, Николае, радуйся приносим ти всегда.
Святителю отче Николае, моли Бога о нас.
Услышав Константин царь благочестивый во сне прещения твоя, со Авлавием епархом, / о мужех онех неправедно имевших погибнути, / вскоре повеле отпустити их, / тебе же радуйся вопияше, Николае.
Слава: Кораблю оному потопающу в мори ты, отче, был еси кормчий, / и мне люте обуреваему от помышлений бесовских, / даждь ядрило благаго разума во уме и в сердце, / яко да всегда радуйся приношу ти, Николае прехвальне.
И ныне: Радуйся, Пречистая Дево, / радуйся, мiру утверждение, / радуйся, яко родила еси Сына, всех Бога, / Того моли, Богородице пренепорочная, / спастися душам нашим.

Песнь 7

Ирмос: Не послужиша твари Богомудрии, / паче Создавшаго, / но огненное прещение мужески поправше, / радовахуся, поюще: / препетый отцев Господь и Бог благословен еси.
Святителю отче Николае, моли Бога о нас.
Святе Николае, святителю Христов / радуйся, ты бо еси радость всем неизглаголанная, / и мне подаждь руку помощи, да глаголю ти: / радуйся, всеблаженне.
Святителю отче Николае, моли Бога о нас.
Егда услышаша воеводы отпущение из темницы повелением твоим, / вземше свещники принесоша ти со свещами, велиим вопиюще гласом: / радуйся, отче преподобне, избавление наше.
Слава: Некогда услышал еси в темнице связанныя, / услыши и мене, Николае, радуйся приносяща ти, / и исхити мя огня геенскаго.
И ныне: Марие Госпоже, Мати Избавителя, / приими мя, кающагося и прибегающаго под кров Твой, / яко да не престая вопию Тебе: / радуйся, Благодатная Богородице Приснодево.

Песнь 8

Ирмос: Отроки благочестивыя в пещи / Рождество Богородично спасло есть, / тогда убо образуемое, / ныне же действуемое, / вселенную всю воздвизает пети Тебе: / Господа пойте дела / и превозносите Его во вся веки.
Святителю отче Николае, моли Бога о нас.
Апостолов сопрестольниче, / со Ангелы служителю Святей Троице, / Николае прехвальне, радуйся, / и мне даруй радость молитвами твоими.
Святителю отче Николае, моли Бога о нас.
Кормчий обуреваемых, Николае, радуйся, / и бурю моих страстей, яже от прилога бесовскаго, утиши, / яко прочее не могу терпети, но вопию: / радуйся, помощниче мой и теплый предстателю.
Слава: О, колика туга обдержит мя от стреляний бесовских, / и язвы терпети ми несть мощно, / пластыря приложити несть врача, / но ты ми приложи пластырь, и елей молитв твоих, Николае, да зову ти: / радуйся, отче преподобне.
И ныне: Купино неопалимая, радуйся, / юже Моисей виде на Синаи, / и лествице, юже Иаков виде, / Преблагословенная Богородице Приснодево.

Песнь 9

Ирмос: Всяк земнородный / да взыграется, Духом просвещаемь, / да торжествует же Безплотных умов естество, / почитающее священное торжество Богоматере, / и да вопиет: / / радуйся, Всеблаженная, / Богородице Чистая Приснодево.

Святителю отче Николае, моли Бога о нас.
Льстиваго стреляния обдержат мя, и стремления греховная, / но надеяся на покров твой, к тебе прибегаю, отче, / яко да отженеши от мене вся лести лукаваго, да зову ти: / радуйся, Николае.
Святителю отче Николае, моли Бога о нас.
Ария безумновавшаго посрамил еси, / пламень же ересей угасил еси, / воеводы в темнице связанныя услышал еси, / и от них радуйся приял еси, / и мы вопием ти, Николае: / радуйся, всеблаженне.
Слава: Агрика онаго услышавый, / и сына его Василия от Амиры восхитивый, / и представивый родителем здрава во един час от срацын, / и мне молящуся, исхити недугущую мою душу, и грехи обложенную, / от огня геенскаго, Николае.
И ныне: Царице, всех Царя рождшая / и носившая Носящаго всю тварь, / спаси мя, величающаго Тя, Пресвятая Владычице.

Молитва святому Николаю

О всесвятый Николае, угодниче преизрядный Господень, теплый наш заступниче, и везде в скорбех скорый помощниче! Помози мне, грешному и унылому, в настоящем житии, умоли Господа Бога даровати ми оставление всех моих грехов, елико согреших от юности моея, во всем житии моем, делом, словом, помышлением и всеми моими чувствы; и во исходе души моея помози ми, окаянному, умоли Господа Бога, всея твари Содетеля, избавити мя воздушных мытарств и вечнаго мучения; да всегда прославляю

Отца, и Сына, и Святаго Духа, и твое милостивное предстательство, ныне и присно и во веки веков, аминь.

Таже: Достойно есть яко воистинну блажити Тя, Богородицу, / Присноблаженную и Пренепорочную и Матерь Бога нашего. / Честнейшую Херувим и славнейшую без сравнения Серафим, / без истления Бога Слова рождшую, сущую Богородицу Тя величаем.

Святитель Никола Чудотворец издревле почитается на Руси как величайший святой. Господь его прославил во всем мире за сильную веру, глубокое смирение, кротость, терпение, преуспевание в воздержании и целомудрии. Святитель Никола имел глубочайшую христианскую любовь, величайшее милосердие и сострадание к людям, всегда спешил к ним на помощь. Угодник Божий услышит наши усердные молитвы и поспешит на помощь и к нам, если мы будем подражать образу его земной жизни. Память святителю Николе 6 декабря (19 декабря по гражданскому стилю).

Тропарь, глас 4-й

П равило вере, и образ кротости, воздержанию учителя яви тя Господь стаду Своему, яже вещем истина. Сего ради стяжав смирением высокая, нищетою богатая. Отче наш святителю Николае, моли Христа Бога спастися душам нашим. (Дважды).

Слава, и ныне, Богородичен. И же от века утаенное, и ангелом несведомое таинство, Тобою Богородице земным явися, Бог в неразмесне снятии воплощаемь, и крест волею нас ради восприим, им же воскресив первозданнаго, и спасе от смерти душа наша.

Песнь 1. Ирмос

Т ристаты крепкии рождеися от Девы, во глубине безстрастия души тричастное потопи молюся, да Ти яко в тимпане во умерщвенем телеси, победное пою воспевание.

Запев: С вятителю Христов Николае, моли Бога о нас (поклон).

Б езпечальную жизнь наследовав отче, и радости духовныя исполняемь присно, всяку печаль отжени молюся от души моея, яко да радуяся славлю тя, священнеишии отче Николае.

Запев. П оложен бысть разумно, на свещнице добродетелей, и яко же свет просвещаеши сердца верных святителю Николае. Тем же верою молю тя, светоносными молитвами си души моея тму отжени.

Слава. Ж ития тленнаго ныне, напастей всяких наполняемь, пучину присно преплавая, да обрящу тя преподобне окормителя, в тишину прелагающа бурю, божествеными молитвами твоими.

И ныне, Богородичен. Н еусыпающую Чистая имущи молитву, успи нашя страсти телесныя и душевныя, священными ходатаиствы Твоими, божественую и спасеную дающи бодрость, в Божию волю и исполнение.

Катавасия: И збави от бед рабы своя, святителю Христов Николае, яко вси по Бозе к тебе прибегаем, к скорому помощнику и теплому заступнику и молебнику ко Спасу о душах наших (поклон) .

Г осподи помилуй (трижды с поклонами).

Песнь 3. Ирмос

Н е мудростию ни силою ни богатством хвалимся, но Твоею Отчею составною мудростию Божиею, яко несть свята паче Тебе Человеколюбче.

Запев. О ружие явился еси, борительныя враги закалая, их же искушения соблюди нас невредны Николае, содевающих божественое хотение.

Запев. С окрушение моея души святителю уврачюй, сокрушивыи вражия козни и ловления, да яко предстателя моего верою величаю тя.

Слава. Р азрушивыи Артемиды бездушная капища, ума моего страстныя кумиры потреби, божествеными ти ходатайствы отче Николае.

И ныне. Б огородичен. Тя предстательницу пречистая Дево стяжахом, претвори нашю скорбь на радость, и печали смерть раждающия избави нас. Катавасия.

Седален, глас 8-й. В озшед на высоту добродетелей, божествеными оттуду отче озарися сиянии чюдес, пресветел воистину явися мiрови пастырь, и в напастех сыи предстатель непобедим. Тем же преславно врага побеждь, лжу отгнал еси, и человеки спасл еси от смерти, Николае. Моли Христа Бога, грехов оставление даровати, чтущим любовию святую память твою.

Слава, и ныне. Богородичен. Я ко Деву едину в женах Тя без семене рождьшую Бога плотию, вси блажим родове человечестии. Огнь бо в Тя вселися Божества, и яко младенца доиши Зиждителя и Господа. Тем же ангельскии и человеческии род достоино славим, Пресвятое Рожество Твое, и согласно вопием Ти, моли Христа Бога грехов оставление даровати, воспевающим достоино славу Твою.

Песнь 4. Ирмос

С едяи во славе на престоле Божественем, на облаце легце прииде Исус Пребожественыи от Пречистыя Девы, и спасе вопиющыя, слава Христе силе Твоей.

Запев. П реславное житие твое, всюду тя преславна показа чюдесы божествеными прославляема, первосвященником украшение, и всем похвалу, чтущим тя Николае радостными песньми.

Запев. Н а высоце престоле блаженне, Бога похвалил еси, смиреномудрием божественым облистаем светлостьми, их же в причастии быти нас сотвори, благоприятными ти мольбами отче мудре.

Запев. Н еправедно ведомыя на смерть избавил еси, ревностию божественою отче священнолепно разгараяся. Тем же вопием ти, такожде изми нас от напастей, умерщвляющих люте, мольбами своими.

Слава. Н а небеса преходя Николае радости невидимыя, посреде ко всем призывающым тя приходиши, облегчевая болезни душ наших, и утешение боголепно подавая.

И ныне. Богородичен. В оинства ангельская ужасающеся Пречистая, песнословят величество божественаго Рожества Твоего, с ними же моли Девице всем спастися, иже верою чистою Тебе ублажающим. Катавасия.

Песнь 5. Ирмос

Н ечестивии не узрят славы Твоея Христе. Но мы Тя Единочаде, отчее зарение славы Божия, от нощи утренююще, воспеваем Тя Милосерде.

Запев. З ашел еси яко же солнце, умер мудре, и восиял еси у Христа, светоносными блистании чюдес твоих, озаряя всю подсолнечную отче Николае.

Запев. С вященне Николае услыши нас, в день наведения бед и скорбей, и всякую тесноту отгоня, благодатию иже в тебе живущаго Духа.

Слава. С окрушеную страстьми житейскими, душю мою имыи, на помощь тя призываю священне Николае, потщися и даждь ми совершенное исцеление, умолив Безгрешнаго.

И ныне. Богородичен. Р азумныма очима Тебе Дево Исаия зря, Нескверная Чистая, вопияше, се хощет родитися от Девы Богоотроковицы Исус Господь, человеком в порождение. Катавасия.

Песнь 6. Ирмос

П риидох во глубины морския, и потопила мя есть, буря многих ми прегрешении. Но яко Бог из тли возвел еси душю мою Премилостиве.

Запев. У креплься крепостию Спасовою, возмогл еси богомудре невидимаго врага погубити, его же лютаго вреждения нас избави, мольбами си отче Николае.

Запев. М учения иже в геенне, и от лукавых человек стужения вреднейшаго избави нас священными молитвами си преславне Николае.

Слава. И же древле умрети неправедно хотяще воеводы, избавишася твоими молитвами, яко же тех и нас исхити всякого вреда, достоблаженне.

И ныне. Богородичен. Л юдие Твои и град, молят Тя Божия Мати, изми нас от всякия беды всечистая Владычице, и иже тамо вечнаго осуждения. Катавасия.

Слава, и ныне. Кондак, глас 3-й. В мирех святе Николае святитель быв, Христово бо преподобне Евангелие исполни, положил еси душу свою за люди своя, и спасл еси неповинныя от смерти. Сего ради освятися, и явися велии таинник Божия благодати.

Икос. В оспоем ныне святителя песньми, мирским людем пастыря и учителя, да молитвами его просветимся. Сей бо явися чист весь, нетленен духом, Христови принося жертву непорочну, чисту и благоприятну, яко святитель очищен душею и телом, и истинен Церкви предстатель и поборник, и велии таинник Божия благодати.

Песнь 7. Ирмос

Ю ноши три в Вавилоне, веление мучителеви на буйство преложиша. И посреди огня ввержени прохлаждаеми вопияху, благословен еси Господи Боже отец наших.

Запев. С вяте Николае, иже во святых единаго Святаго Бога почивающаго моли, освятити нас, и низпослати на ны милости Того богатыя.

Запев. П реподобен, прав, и кроток, тих и смирен быв славне, к высоте священства взятся преславне, чюдеса совершая и знамения.

Слава. З аконы божественыя соблюд преподобне, весь явился еси Божии храм честнеишии. Тем же ти вопием всеблаженне, беззакония всякаго избави нас ходатаиством си.

И ныне. Богородичен. У спи страстем востания моея души, бодреною мольбою си: дая ми бодрость Отроковице, уныния дремание далече отгонящи. Катавасия.

Песнь 8. Ирмос

И збавителю всех всесильне, посреде пламене веровавшыя, сошед оросил еси, и научи пети, всякая дела благословите Господня Господа.

Запев. В итийствуя божественая Николае, беззаконнующих незатворимая уста, явьствено заградил еси. И от Ариева губительства многих избавил еси, православно поющих, благословите вся дела Господня Господа.

Запев. И же победы тезоименит святе, победители нас покажи молитвами си, страстем раждающим смерть, и беззаконных человек языка льстива, иже верою тя присно блажащих.

Запев. П омощь твою спасеную, низпослати нам умолен бываи, чюдотворче Николае в день.беды, внегда тя верою просяще, молим.

Слава. Троичен. П равославно вернии поклонимся святеи Троице несозданней, Отцу пребезначальному, и Сыну и Святому Духу, вопиюще, благословите вся дела Господня Господа (поклон).

И ныне. Богородичен. М илости Твоей сподоби мя, яже Бога благомилостиваго рождьши благословеная Владычице. И в час судныи представши, избави тамошняго осуждения. Катавасия.

Песнь 9. Ирмос

Е вва убо недугом ослушания, клятву вселила есть: Ты же Дево Богородице прозябением прижития Твоего, мiрови благословение процвела еси. Тем же Тя вси величаем.

Запев с поклоном. И сцеления совершая гроб твой, источает миро благоухания преподобне, иже верою и любовию приступающим Николае, и твою память чтущим. Тем же тя вси величаем.

Запев. Я ко солнце богоблаженне Николае, всю подсолнечную озаряеши божественых чюдес лучами. Тму лютых обьстоянии отгоняя, священными ходатайствы твоими, первосвященником украшение.

Запев. О бычно ущедри нас Николае, житейскими напастьми, и бесовскими лестьми, лукавых же человек искушенми, люте обуреваемых всегда: яко да тя любовию ублажаем.

Слава. Д не и часа страшнаго поминай о душе моя, егда тя хощет привести на суд Владыка, и судити твоим деянием тайным. Возопий Ему, Спасе, спаси мя Николы мольбами.

И ныне. Богородичен. Г лас Тебе божественаго Гавриила, приносим радостно и взываем: радуися Раю, иже Древо животное посреде имущая всегда, преславная Полато Слову. Радуися Дево Всенепорочная. Катавасия.

Отпуст: Г осподи Исусе Христе Сыне Божии, молитв ради пречистыя Твоея Матере и иже во святых отца нашего Николы, архиепископа Мир Ликийских чюдотворца, и всех ради святых помилуй и спаси нас, яко благ и человеколюбец. А минь. Г осподи помилуй (трижды) . Исходные поклоны.